Книжниот фонд на училишната библиотека неделава беше збогатен уште со девет нови наслови и 23 книги кои беа добиени како подарок за нашето училиште од писателката Бистрица Миркуловска.
Сите ученици кои имаат интерес можат да ги позајмат и прочитаат нејзините книги: „Навева снег“, „Цвеќенца“, „Сите деца мили“, „Молика Пелистерска“, „Далечни проблесоци“, „Лице и опачина“, „Градинче“, „Илина“ и „Цвеќе на мирот“.
Сите ние, вработените и учениците, на чело со директорот г-ѓа Наташа Аврамска срдечно и се заблагодаруваме на г-ѓа Бистрица Миркуловска за нејзиниот подарок посакувајќи и уште многу години здравје и спокој во пензионерските  денови.
Бистрица Миркуловска е познат поет, раскажувач, писател за деца, преведувач, професор во пензија.
Родена е на 14 Март 1930 година во Скопје. Овде дипломирала на тогашниот Филозофски факултет на групата Македонски јазик со книжевност, а потоа запишала постдипломски студии од областа на македонистиката. До пензионирањето работела како професор по словенечки јазик на Филолошкиот факултет „Блаже Конески“  на Катедрата за македонски јазик и јужнословенски јазици. Била лектор по македонски и по словенечки јазик на Масариковиот универзитет во Брно, Чешка Република. Таа е  член на Друштвото на писателите на Македонија од 1971 година.
Има напишано голем број на книги за деца, а се јавува и како преведувач од словенечки на македонски јазик и обратно. Добитник е на голем број признанија и награди за своите напишани поетски и прозни дела.