Во рамките на Меѓународниот фестивал „Јаков од Камена Река“ денес во ООУ „Кирил и Методиј“ во Македонска Каменица се одржа натпревар по краснопис. На натпреварот земаа учество поголем број ученици од основните училишта од Источниот регион (Делчево, Македонска Каменица, Берово, Пехчево, Виница и Блатец).

Учениците од ООУ „Дедо Иљо Малешевски“ повторно се најдоа меѓу првонаградените. Теодора Пачемска од VI одделение го освои третото место, а ученичката Андреа Боболинска доби благодарница. Честитки, да им се множат успесите!

Натпреварот се организира во чест на Јаков од Камена Река кој бил првиот македонски печатар од 16 век и имал своја печатница во Венеција во која ја отпечатил првата книга со кирилично писмо на црковнословенски јазик.

Денес кога убавото рачно, ракописно пишување е се поретко застапено меѓу децата и возрасните ваквите натпревари се голем поттик и мотив за најмладите да го чуваат, негуваат и практикуваат кирилското писмо и неговото правилно пишување.