По повод Меѓународниот ден на жената – 8 Март, учениците од ООУ „Дедо Иљо Малешевски“ во Берово, под менторство на наставничката Сузана Гашчеовска, организираа хуманитарен базар под мотото „Нишки на солидарност“.

Базарот се одржа денес (6 март 2025 г.), со почеток во 11:30 часот, во училишниот двор. Посетителите имаа можност да уживаат во богата понуда на рачно изработени предмети, изработени од вредните раце на учениците. Од уникатни честитки, накит и декорации, до вкусни домашни специјалитети, имаше по нешто за сечиј вкус.

Овој настан имаше и благородна цел – сите собрани средства од продажбата ќе бидат донирани на семејството Цоцовски, за да им се помогне во обновата на нивниот дом по неодамнешниот пожар. Средствата ќе бидат донирани преку Црвениот крст.

Со овој базар, учениците и наставниците од ООУ „Дедо Иљо Малешевски“ упатија силна порака на солидарност и заедништво, покажувајќи дека и малите дела можат да направат голема разлика, особено кога се работи за помош на оние на кои им е најпотребна.

Училиштето упатува голема благодарност до родителите, учениците и вработените во ООУ „Дедо Иљо Малешевски“ за нивната креативност, посветеност и придонесот за успешниот ден.