Денес, учениците и вработените од ООУ „Дедо Иљо Малешевски“ – Берово, заедно со вредните ученици и наставници од подрачните училишта, со гордост зедоа учество во големата национална еколошка акција „Генералка Викенд“. Оваа иницијатива, која се одржува секој втор викенд во мај во период од десет години (2021-2031), има за цел да ја исчисти нашата земја од отпадот и да промовира зелена иднина за сите нас.

„Генералка Викенд“ е најмасовниот еколошки настан на Балканот, во кој се очекува да се вклучат над 20.000 волонтери ширум земјата, обединети во мисијата за почиста и поздрава животна средина.

Нашите вредни ученици, како од централното училиште во Берово, така и од подрачните училишта во селата, полни со ентузијазам и желба да придонесат, денес ги засукаа ракавите и активно се вклучија во акцијата. Тие темелно ги исчистија своите училишни дворови и непосредната околина, правејќи ги уште поубави места за учење и игра. Активностите не застанаа тука! Со многу труд и посветеност, учениците го чистеа и отпадот од јавните површини и улици, како во градот Берово, така и во селата каде што се наоѓаат нашите подрачни училишта, давајќи светол пример за еколошка свест и грижа за заедницата.

Горди сме на сите наши ученици и наставници, од градот и од селата, што уште еднаш ја покажаа својата одговорност и подготвеност да бидат дел од позитивни промени. Со вакви заеднички акции, не само што придонесуваме за почиста околина, туку и ги учиме младите генерации на важноста од зачувување на природата и активното граѓанство.

Да продолжиме заедно да се грижиме за нашето Берово и нашата Македонија!