Хуманоста како една од најдоблесните особини на човечкиот род, е особина која се стекнува и се изградува уште од најмали нозе.

Како дел од хуманите активности кои се организираат деновиве во општина Берово, е и акцијата на учениците од ООУ„Дедо Иљо Малешевски“ од Берово кои покрај тоа што хуманоста ја искажуваат преку поставување на кутија за собирање на средства во училиштето, драмската секција ја изведе и претставата “Што се случува со нашите животи“ од која сите собрани средства ќе бидат донирани за настраданите лица од поплавите во Србија и Босна.

Претставата е изведена во преполната сала на Бизнис инкубаторот во Берово каде 17-те ученици, кои воедно се и автори на текстот, осврнувајќи се на денешното живеење на младите и пороците кои ги донесе современото живеење, ја потенцираат важноста од негувањето на хуманите вредности како и негувањето на вистинкото пријателство и пријатели.

Во Бизнис инкубаторот во тек е и акција за собирање на средства и намирници за настраданите од поплавите во Србија и Босна која ќе трае до утре (среда).