Општина Берово и оваа година активно се вклучи во одбележувањето на „Европската недела на мобилност“ која традиционално се одржува секоја година од 16 до 22 септември.
Со самото вклучување во оваа акција коjа традиционално се одржува низ целиот свет, посебно се одбележува денот 22 Септември – Ден без автомобили , кога се затвара за сообраќај една или повеќе фреквентни сообраќајници и се резервираат за велосипедисти, пешаци или за јавен транспорт. На тој начин се упатува силна порака дека автомобилите треба да се користат одговорно, со избирање на „паметен“ начин на транспорт, со што се води сметка за животната средина и загадувањето што го произведуваме.
Денот без автомобили во Берово беше одбележан во соработка на општина Берово, ООУ “Дедо Иљо Малешевски“ – Берово и Полициската станица – Берово кои заеднички ја организираа активноста со која учениците од основното училиште во Берово се качија на своите велосипеди и ја испратија својата порака за заштита на животната средина.
Учениците возеа по дел од ул.“Маршал Тито“ во Берово во потегот од раскрсницата со ул.„Даме Груев“ до раскрницата со ул. „Илинденска“ и „Мирче Ацев“ која беше затворена за сообраќај на моторни возила.