Училиштето не е само место каде се стекнуваат знаења, туку и средина каде се градат вистинските вредности, емпатијата, другарството и меѓусебната почит. Во насока на создавање безбедна и пријателска атмосфера за секое дете, на 2 и 5 јуни се реализираа исклучително значајни едукативни активности во нашето училиште.

Учениците од VII-в одделение одржаа предавање и работилница кои се дел од Проектот – Кампања за поткревање на свеста за меѓуврсничко насилство (булинг). Оваа одлична иницијатива беше успешно реализирана во рамките на Општествено-хуманитарната работа.

Преку овие работилници, учениците имаа можност отворено да разговараат за тоа како да го препознаат врсничкото насилство, кои се начините за негово спречување и колку е важна поддршката меѓу соучениците.

Се гордееме со нашите седмоодделенци кои покажуваат голема зрелост, преземаат иницијатива и активно работат на подигнување на свеста за оваа важна тема. Заедно кажуваме СТОП за врсничкото насилство!