Развивањето на свеста за праведно општество и вистински вредности започнува токму од училишните клупи. Во текот на оваа учебна година, учениците од VII, VIII и IX одделение при ООУ „Дедо Иљо Малешевски“ – Берово, заедно со своите врсници од подрачните училишта во Двориште, Митрашинци и Будинарци, беа дел од еден многу значаен едукативен процес.

Во рамките на наставата по предметот Граѓанско образование, но и преку низа воннаставни активности, тие континуирано реализираа антикорупциски активности. Целиот овој циклус на едукација и подигнување на граѓанската свест беше успешно реализиран под водство на наставничката Софче Дочинска.

Како круна на сите залагања и научени лекции низ годината, се одржа завршната заедничка работилница која го носеше моќното мото „Младите со правила – Стоп за корупција“.

Преку овие активности, нашите ученици покажаа дека ја разбираат важноста на правилата и дека се подготвени да градат подобро општество засновано на интегритет и транспарентност. Се гордееме со нивната зрелост и активен граѓански придонес!