Во петокот, на 16 мај 2025 година, учениците од VIII и IX одделение од ООУ „Дедо Иљо Малешевски“ – Берово, заедно со нивните соученици од подрачните училишта во селата Двориште, Митрашинци и Будинарци, остварија значајна едукативна посета на Собранието на Република Северна Македонија во Скопје.

Посетата беше реализирана во придружба на наставничката по граѓанско образование, Софче Дочинска, и наставничката по историја, Славица Синдраковска.

За време на посетата, учениците имаа единствена можност одблиску да се запознаат со работата, надлежностите и функцијата на законодавниот дом на нашата држава. Тие ја разгледаа внатрешноста на зградата на Собранието, вклучително и пленарната сала каде што се носат клучните одлуки. Исто така, добија одговори на нивните прашања поврзани со демократските процеси, улогата на пратениците и функционирањето на државните институции.

Оваа активност е дел од предвидените наставни содржини по предметите граѓанско образование и историја. Главната цел на ваквите посети е да се зајакне свеста кај учениците за важноста на демократијата, активното учество во демократските процеси и градењето на одговорно граѓанско општество. Преку непосредно искуство, учениците полесно ги разбираат концептите за кои учат во училница.

Веруваме дека оваа посета ќе остане во сеќавање на учениците и ќе придонесе за нивното понатамошно образование и развој како идни активни граѓани.