Денеска од 12:15 до 13:00, учениците од V одделение во ООУ „Дедо Иљо Малешевски“ имаа можност да присуствуваат на интересна и едукативна презентација спроведена од ОВР Берово, каде што сообраќајните полицајци ја прикажаа својата опрема и одговорија на бројни прашања и загатки, наменети за најмладите. Целта на оваа активност беше да се едуцираат децата од најмала возраст како безбедно и одговорно да се однесуваат на патот.

Во текот на презентацијата, учениците научија основни сообраќајни правила, како значењето на семафорите и правилното користење на пешачките премини. Полициските службеници ги поттикнаа учениците да бидат пример за другите преку почитување на сообраќајните правила, да внимаваат кога ја поминуваат улицата со поглед лево и десно и да користат пешачки премин.

Посебен акцент беше ставен на важноста од носење заштитна опрема при возење велосипед, избегнување на мобилни телефони или слушалки додека се движат по улица, како и безбедното однесување во автомобил – секогаш да бидат врзани и да слегуваат од безбедната врата.

Оваа презентација беше од голема важност за развивање на свеста кај најмладите за безбедноста на патиштата, помагајќи им да разберат како да ги заштитат себе си и другите во секојдневното движење.